Rusiye Mudafaa nazirligi, iyülniñ 25-nde gece Qırımğa pilotsız uçaq ve deñiz ekipajsız katerleri ücüm etti, dep bildirdi. Mütenasip haber Rusiye Mudafaa nazirliginiñ telegram kanalında derc etildi.
Müessisede bildirilgeni kibi, Rusiye ordusı Qırım yarımadasına doğru ketken dört dronnı ve ekipajsız eki katerni yaqaladı ve yoq etti. Rusiye Mudafaa nazirliginde dronlarnıñ sayısı ne qadar olğanını bildirmeyler.
Müessise bu malümatnı tasdıqlamadı, alternativ menbalar yardımınen bu beyanatlarnı teşkermek ise imkânsız.
Ukraina tarafı bu haberlerni izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
