Rusiye Mudafaa nazirligi mayısnıñ 24-ne keçken gecesi Qırım yarımadasına ATACAMS amerika raketaları ücüm etkenini bildirdi.
Rusiye müessisesiniñ bildirgenine köre, Qırım üzerinde üç ATACMS raketası tüşürildi. Telegram kanalımıznıñ abunecileri Aqmescit civarında eñ az altı patlav ve Belbek ve Novofedorovka ava limanları civarında sekiz patlav aqqında haber ettiler. "Suspilne"nıñ malümatına köre, Aluştada eñ azından beş patlav eşitildi.
Rusiye Mudafaa nazirligi, Qara deñizde Qırım yarımadası yönelişinde ketken Ukrayina Arbiy deñiz quvetleriniñ ekipajsız katerleri tapılğanını ve olar da yoq etilgenini iddia ete. Rusiye müessisesiniñ malümatını alternativ menbalar yardımınen tasdıqlamaq şimdilik mümkün degil.
Ukrayina tarafı bu beyanatlarnı ve Qırımğa gece ücümini şimdilik izaatlamadı.
Mayısnıñ 23-nde aqşam Qırımnıñ telegram kanalları ve Qırım.Aqiqat oquyıcıları Qırımğa raketa ücümleri aqqında bildirdiler . Patlavlar Aqmescit, Saq, Aluşta, Yalta, Canköy ve Kezlevde eşitildi.
Qırımnıñ Rusiye yolbaşçısı Sergey Aksönov soñra raketa ücümini tanıdı. Onıñ aytqanına köre, Aluştada "boş qalğan hocalıq obyektine" zarar ketirildi. Bundan ğayrı, o, Aqmescit rayonında "eki tesadüfiy keçici"niñ ölümi aqqında bildire.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
