Rusiye Mudafaa nazirligi bildirgenine köre, Ukrayina gece Keriç köprüne 12 ATACMS raketasınen ücüm etti.
Müessise Rusiye Federatsiyasınıñ ava mudafaası olarnı yoq etti, lâkin Rusiye Mudafaa nazirligi bir delil köstermedi, dep bildirdi.
Rusiye Mudafaa nazirligi beş Ukrayina uçucısızı ve eki deñiz dronunıñ ücümi aqqında bildirgen edi. Ukrayina tarafı bu malümatnı izaatlamadı.
Keriç köpründe avgustnıñ 16-nda gece 3:15-ten saba 7:13-ke qadar uçucısızlarnıñ ücümi sebebinden maşina areketi toqtatılğan edi. Avgustnıñ 16-nda saba Keriçte patlavlar eşitildi. «Krımskiy veter» Telegram kanalı yazğanına köre, şeerde Sovetskaya soqağında tüşken parçalardan qaldırım zarar kördi, yol qısmen teşildi.
Keriç köprü Rusiyeden işğal etilgen Qırımğa esas yol ola ve Qırım yarımadasına arbiy taşuvlar içün qullanıla.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
