Martnıñ 1-ne keçken gecesi ukrayin pilotsız uçaqları Qırımğa küteviy şekilde ücüm etkenler. Bunı Rusiye Mudafaa nazirligi haber etti.
Nazirlikniñ bildirgeni kibi, "Kıyiv tarafından Qırım obyektlerine kütleviy ücüm" vaqtında Rusiye ava mudafaa vastaları altı ukrayin pilotsız uçağını urıp tüşürgen. Umumen qaç pilotsız uçaq uçurtılğanı bildirilmey. Berilgen malümatqa köre, zarar körgenler ve bozuqlıqlar yoq. Kıyiv Qırımğa ücümni izaatlamay.
Martnıñ 1-ne keçken gecesi işğal etilgen Qırımnıñ farqlı rayonlarında patlav sesleri eşitilgen. Rusiye tarafdarı bloger Aleksandr Talipov pilotsız uçaqlarnıñ ücümi aqqında bildirdi.
Avgusttan başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
