Rusiye Mudafaa nazirligi üçünci kere Kyiv, Çernigiv, Sumı, Harkiv ve Mariupol sakinleriniñ tahliyesiniñ planlaştırılğan gumanitar koridornıñ teşkili içün "tınçlıq rejimini" ilân etti.
Aynı zamanda, bu, gumanitar koridorlarnıñ Rusiye ve Belorusiyege açılmasına qarşı çıqqan Ukraina tarafı ile kene de kelişilmedi.
Ukraina baş nazir muavini İrina Vereşçuk tek bir gumanitar koridornıñ açılmasını tasdıqladı – Sumı şeerinden Poltavağace (anda rusiye arbiyleri yoq). Vereşçuknıñ haber etkenine köre, bu yol Rusiye tarafı ile kelişilgen, amma aynı zamanda o, provokatsiyalar ola bileceginden raatsız olğanını bildirdi.
Haber etilgeni kibi, Poltavadan Sumığace tahliye içün 35 avtobus çıqqan.
Keçenlerde aqşam rus işğalciler Sumığa qarşı avadan ateş açtı, dep bildirdi Sumı memuriyetiniñ başı Dmitriy Jivitskiy. Berilgen malümatqa köre, eñ azından 9 adam, şu cümleden 2 bala ölgen.
Mariupoldan tahminen 200 biñ sakin öyle de tahliye etilmedi, anda uruşlar alâ daa devam ete.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
