Rusiye akimiyeti Rusiye ve ilhaq etilgen Qırım territoriyasına dronlarnıñ tüşkenini bildirdi. Rusiye Mudafaa nazirligi 162 uçucısız uçaq urulıp tüşürilgenini bildirdi, şu cümleden eki uçaq yarımada üzerinde tüşürildi.
Rusiye arbiy idaresiniñ malümatına köre, ukrayin uçucısız uçaqları eñ azından sekiz vilâyetke ve ilhaq etilgen Qırımğa ücüm etken. Eñ çoq dron Kursk (57), Belgorod (31), Lipetsk (27) vilâyetlerinde urulıp tüşürilgen. Rusiye Mudafaa nazirliginiñ bildirgenine köre, Voronej, Brânsk, Râzan, Orlov ve Tambov vilâyetlerine de ücüm etilgen.
Lipetsk vilâyetiniñ gubernatorı İgor Artamonovnıñ bildirgenine köre, ücüm neticesinde Lebedânsk rayonında bir insan yaralanğan. Bundan da ğayrı, Lebedânskta uçucısız uçaqnıñ parçaları eki ev üstüne tüşken. Artamonov şunı da qayd etti ki, "yerli sakşnler UAV parçalarınıñ minasızlaştırıluvı içün patlap seslerini eşite bileler".
Kursk vilâyetinde, gubernator vazifesini vaqtınca eda etken Aleksandr Hınşteynniñ aytqanına köre, çoq daireli ev, üç şahsiy ev ve garaj zarar körgen, yaralanğanlar ise yoq.
Voronej vilâyetinde pilotsız uçaqnıñ elektrik ağına tüşmesi neticesinde M-4 "Don" trassasında yüksek voltlı tel bozulğan, dep bildirdi region yolbaşçısı Aleksandr Gusev. Rostov tarafındaki yolnıñ bir qısmını qapatqanlar.
Yerli sakinler Borisoglebskte arbiy üçaq alanına ücüm etilgenini yazğan ediler, dep haber ete Astra telegram-kanalı. Şeerde bu sene qara qış ayında ücüm etilgen aviatsiya tamir zavodı da bar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
