Aqyarda sentâbrniñ 22-nde Rusiye arbiyleri duman perdesini qullandı, dep bildirdi yerli Telegram kanalları.
Saat 10-larda Keriç köpründe areket toqtatıldı, deñiz yolcu naqliyatınıñ işi de toqtatıldı.
Rusiye Mudafaa nazirligi Qırımğa qarşı ücüm aqqında bildirdi. Müessise bir raketa ve eki uçucısız urıp tüşürildi, dep ayta.
Qırımnıñ Rusiye akimiyeti bu malümatnı izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
