Gece Qırım uçucısızlarnıñ ücümine oğradı, dep bildire Rusiye Federatsiyasınıñ Mudafaa nazirligi.
Müessise haberine köre, Rusiye ava mudafaası 26 uçucısıznı tüşürgen eken, delilleri yoq. Dron qayda tüşürildi Mudafaa nazirligi haber etmey.
«Krımskiy veter» Telegram kanalı Canköy ve Qurman rayonlarında darbeler aqqında bildire. Oquyıcılarnıñ malümatına esaslanıp, Canköy rayonında arbiy uçaq alanına darbe aqqında yaza.
Muarririyet bu malümatnı mustaqil şekilde teşkerip olamay.
Mayısnıñ 16-nda Ukrayina ve Rusiye Telegram kanalları dronlar Qırımğa ücüm etti, dep bildirdiler. Olarnıñ malümatına köre, Rusiye Federatsiyası Qara deñiz flotu yalı mudafaasınıñ 126-ncı ary brigadası yerleşken Anğara (Perevalnoye) rayonında silâ anbarı darbege oğradı. Bundan soñ Aqmescit-Aluşta yolunda areket toqtatıldı.
2022 senesinden başlap yarımada aman-aman er kün uçucısız ve raketalarnıñ ücümine oğray, çoqusı alda Rusiye Federatsiyasınıñ Mudafaa nazirligi ya da Rusiye akimiyeti, bu malümat olsa da, arbiy obyektlerge darbe endirilgenini tasdıqlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
