Rusiye Federatsiyasınıñ Mudafaa nazirligi Qırımğa 16 ukrayin dronı ve daa bir dronQara deñizde ücüm etti, dep bildirdi. Bu aqta Rusiye arbiy müessisesiniñ içtimaiy ağlardaki saifelerinde aytıla.
Berilgen malümatqa köre, yerli saatnen 8:00-den 13:00-ke qadar Rusiye Federatsiyasınıñ Ava mudafaası yarımadada ve Qara deñizde 17 uçucısıznı yoq etti. Tüşürilgen dronlarnıñ sayısını müessise bildirmedi. Bu malümatnı tasdıqlağan bir delil yoq. Ücüm aqibetleri aqqında haber etilmey.
Bunıñnen beraber, "Krımskiy veter" Telegram kanalı abunecileriniñ malümatına esaslanıp, Canköy rayonında patlavlar aqqında bildirdi. Aynı vaqıtta "Krımenergo" Rusiye müessisesi Canköyde qaza sebebinden elektrik energiyası qısmen söndürildi, dep bildirdi. Bundan ğayrı, İslâm Terek qasabasında darbe aqqında haber etili. "Krımskiy veter" darbe neticesinde qara tuman körüngen videonı derc etti. Levhalarnı cenk vaziyetinde teşkermek zor.
Qırımnıñ Rusiye yolbaşçısınıñ mesleatçısı Oleg Krüçkov İslâm Terekte "infrastruktura obyekti zarar kördi. Yanğın söndürile", dep haber etti. Başqa tafsilâtlar yoq, Rusiye akimiyeti bu ücümnen bağlı diger resmiy malümat bermedi.
Bundan evel dekabrniñ 26-na keçer gecesi işğal etilgen Aqyar civarındaki "Kaça" arbiy uçaq alanı rayonında eki küçlü patlav oldı, dep haber etildi.
Rusiye Federatsiyasınıñ Mudafaa nazirligi saba işğal etilgen Qırımda beş "uçaq çeşitli uçucısız uçuş cihazı" urıp tüşürildi, dep esabat berdi.
Ukrayina arbiyleri Qırımda Rusiye arbiy obyektlerine darbe endirgenine dair bir malümat şimdilik bermedi.
