Rusiye Mudafaa nazirligi aprelniñ 9-nda aqşam uçucısızlarnıñ Qırım ücümini tasdıqladı.
Rusiye müessisesi haber etkenine köre, Rusiye ava mudafaa quvetleri saat 20:15-ten 21:10-ğa qadar üç Ukrayina dronını urıp tüşürdi. Rusiye Mudafaa nazirligi bu malümatnı tasdıqlaycaq bir delil köstermedi. Ukrayina arbiyleri de bu haberni şimdilik izaatlamadı.
«Krımskiy veter» yerli sakinlerniñ malümatına esaslanıp, aprelniñ 9-nda aqşam Qırımnıñ ğarbindeki Saq ve Novofedorovkada patlavlarğa oşağan küçlü sesler eşitile. Onıñ malümatına köre, dronlarnıñ ücümi altında Saq rayonındaki Şelkoviçnoye (Temeş) köyü civarında radiolokatsion stantsiya buluna, dep bildirdi. Bu malümatnı başqa menbalarda tasdıqlamaq şimdilik imkânsız ola.
Rusiye monitoring Telegram kanalları Saqtan Novofedorovka tarafına uçqan uçucısızlarnıñ ücümi aqqında da yaza. Anda Aqyar, Kaça ve Kezlev içün uçucısız telükesi aqqında tenbileyler.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
