Rusiye Mudafaa nazirligi Qırım territoriyasına "Neptun" raketi ile ücüm etilgenini bildirdi. Müessiseniñ bildirgenine köre, onı Qara deñizniñ şimaliy-ğarbiy qısmında urıp tüşürgenler.
"Ava mudafaasınıñ nevbetçi vastaları Qara deñizniñ şimaliy-ğarbiy qısmında ukrayin raketasını taptı ve yoq etti", - dep yazıla beyanatta.
Berilgen malümatqa köre, ücüm Moskva vaqtı ile saat 12:30-ta (Kıyiv vaqtı şle saat 11:30-ta) olğan. Bu vaqıtta işğal etilgen Aqyarda ava telükesi ilân etildi. Bu, bugün endi ekinci sirena oldı
Cumaaqşamı künü Qırım.Aqiqat mühbiri bildirdi ki, Aqyarda ava telükesi ilân etilgen soñ 10-ğa yaqın patlav eşitildi. Şeerniñ rusiyeli başı Mihail Razvojayev, "bir qaç ava nişanı urulğanını" bildirdi.
Rusiye Mudafaa nazirligi öz beyanatında Qırım üzerinde 10 raketanıñ yoq etilgeni aqqında bildirdi. Rusiye müessisesi, bular avadan idare etilgen raketalar olğanını iddia ete ve ücümde Ukrayinanı qabaatlay.
Rusiye Mudafaa nazirligi yanvarniñ 4-nde Qırım üzerinde yapılğan ekinci ava ücüminde 36 uçucısız uçaqnı yoq etkenini de iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
