Rusiye Mudafaa nazirligi Rusiye ve ilhaq etilgen Qırım territoriyasında uçaqsuz uçucılarnıñ ücüm etkenini bildirdi. Qırım telegram kanalları yarımadada patlav sesleri aqqında yazdı.
Rusiye mudafaa nazirliginde, RF territoriyasında 84 dron ve Qırım üzerinde bir dron urıp tüşürildi, dep iddia eteler.
Bunıñnen beraber, "Krımskiy veter" telegram-kanalı Canköyde ava mudafaası işiniñ sesleri ve Keriçte, em de Kezlev civarındaki Vitino qasabasında patlav aqqında yazdı. Şimdilik tafsilâtları belli degil.
Patlavlar gece qomşu Rusiye Federatsiyasında da, hususan Kursk ve Voronej vilâyetlerinde de eşitildi. Şaatlar Novorossiysk limanında yanğın aqqında bildireler, Anapada ara-sıra sirenalar yanğanını eşiteler.
Rusiye Mudafaa nazirligi bildirgenine köre, Voronej vilâyeti ve Krasnodar ülkesi üzerinde 16 dron, Belgorod vilâyetinde dört, Tambov vilâyetinde eki ve Kursk vilâyetinde birer dron yoq etildi. Daa 45-i Qara ve Azaq deñizlerinde urıp tüşürildi. Rusiye akimiyeti ve arbiyleriniñ beyanatlarını mustaqil menbalarnıñ yardımı ile tasdıqlap olamay.
Ukrayina tarafı bu haberlerni izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı "Ukrayina uçucısızlarına" qarşı ateş ve "ava mudafaa sistemasınıñ işi" dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün "esas telüke" dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
