Rusiye Mudafaa nazirligi Qırımda 59 ve Qara deñizde 11 uçucısız uçaqnıñ ücüm etkenini bildirdi. Mütenasip haber çeçek ayınıñ 25-nde saba müessiseniñ içtimaiy ağlarında derc etildi.
Beyanatta aytılğanı kibi, uçucısız uçaqlarnı Rusiye ava mudafaası quvetleri yoq etti. Bunıñ ile "Krımskiy veter" telegram kanalınıñ bildirgenine köre, ücüm altında Novofedorovka ve Qaçıdaki Rusiye arbiy ava limanları buluna, bundan ğayrı, patlavlar Ermeni Bazar ve Krasnoperekopskta eşitildi. Ücümniñ aqibetleri daa belli degil.
Daa evel berilgen malümatqa köre, çeçek ayınıñ 24-ne keçken gecesi Rusiye akimiyeti Keriç köpründen areketni toqtattı. "Krımskiy veter" telegram kanalı haber etkenine köre, patlav sesleri Canköy, Canköy rayonı, Ermeni Bazar, Krasnoperekopsk, Saq, Novofedorovka, Zaozernıy, Gvardeyskoye, Aqmescit, Qurman ve Eski Qırımda eşitildi.
Rusiye Mudafaa nazirligi o vaqıt Rusiye ava mudafaası quvetleri 45 dronnı yoq etkenini bildirdi, amma deliller ketirmedi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
