Rusiye Mudafaa nazirligi fevralniñ 17-nde saba Qırım üzerinde pilotsız uçaqlarnıñ ücüm etkeni ve Qara deñizde dronlarnıñ urıp tüşürilgeni aqqında bildirdi.
Müessisede bildirilgeni kibi, Rusiye ava mudafaası quvetleri Qırım yarımadası üzerinde 15 dronnı, Qara deñizde yedi dronnı ve Azaq deñizinde daa 38 dronnı urıp tüşürdi. Rusiye Mudafaa nazirliginiñ bildirgenine köre, Ukrayinanıñ işğal etilgen regionları ve qomşu Rusiyeniñ ava boşluğında 90 ukrayin pilotsız uçaqnı yaqaladılar ve yoq ettiler. Bunıñnen beraber, müessisede öz beyanatlarını tasdıqlamağanlar. Rusiyege ve onıñ nezaretindeki topraqlarğa ücüm etken uçaqlarnıñ sayısı aqqında da haber etilmedi. Ukrayina arbiyleri bu haberlerni izaatlamadı.
Aynı zamanda, "Krımskiy veter" telegram kanalı, fevralniñ 17-nde saba Qırımnıñ ğarbındaki Zaozernoye qasabasında patlavlarğa oşağan eki yüksek ses eşitildi, dep bildirdi. Bundan ğayrı, keçken aqşam Kefe rayonında patlav aqqında haber etilgen edi. Şimdilik tafsilâtlar ögrenilmekte.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
