Rusiye Mudafaa nazirligi, Saratov vilâyetiniñ üzerinde uçaq tipli dronnıñ urıp tüşürilüvi aqqında bildirdi. Müessise ücümde Ukrayina akimiyetini qabaatladı.
Saratov vilâyetiniñ gubernatorı Roman Busargin bildirdi ki, dron Engel rayonınıñ üzerinde urıp tüşürildi. "Bir kimse yaralanmadı. Meskün yerlerniñ infraterkibi zarar körmedi. Bütün obyektler er zamanki kibi çalışa", - dep yazdı o.
Engels şeerinde arbiy uçaq alanı bar, mında hususan ukrayin territoriyasına ücüm etken Rusiye arbiy uçaqları uça. Bu, uçaq alanına ücümniñ birinci vaqiası degil.
2022 senesi dekabrniñ 5-nde uçucısız uçaqlar Ryazan vilâyetindeki "Dâgilevo" ve Saratov vilâyetindeki "Engels" arbiy uçaq alanlarına ücüm etti. Rusiye Mudafaa nazirligi, ücümniñ maqsadı "Rusiye uzaq aviatsiyasınıñ uçaqlarını areketsizleştirmek" olğanını bildirdi, eki uçaq zarar kördi: olarnıñ "korpusı az zarar kördi". Üç Rusiye arbiyi elâk oldı, daa dörtü yaralandı.
2022 senesi dekabrniñ 26-na keçeken gecesi uçaqsuz uçuşlar kene Engelsteki ava limanına ücüm etti. Rusiye Mudafaa nazirligi ava mudafaası vastaları ukrayin uçucısız uçağını tüşürgenini bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
