Rusiye Mudafaa nazirligi BAT-2 arbiy şeerçikni işğal etilgen Aqyarnıñ mülkiyetine berdi. Bu «Çayka» bala lageri ve Batiliman ayırığı. Bunı Rusiye nezaretinde olğan şeer valisi Mihail Razvojayev bildirdi.
«Yazıq ki, bu mevsim bir sağlamlaşma kampaniyası çerçivesinde onı qullanıp olamaycaqmız. Amma aydın bir strategiya bar, yañartıluvı planlaştırıla», – dep yazdı Razvojayev «VKontakte» içtimaiy ağında.
«Çayka» bala lageri 1965 senesi quruldı. Soñki yıllar devamında işhaneniñ faaliyetinde bir çoq zorluqlar oldı ve 2020 senesine yaqın iflâs derecesine keldi. Zavodnıñ bütün obyektleri Rusiye Mudafaa nazirligiñ mülkiyetine keçti.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
