Rusiye mudafaa naziri Andrey Belousov mayısnıñ 30-na keçken gecesi Qırımğa ATACMS raketa ile ücüm etilgenini bildirdi. Rusiye kütleviy haber vastaları müessise yolbaşçısınıñ aytqanlarını yaza.
Onıñ aytqanına köre, bu, yarımadanı Rusiye Federatsiyası ile bağlağan Keriç köprüne yapılğan eñ büyük ücüm oldı.
Belousovnıñ aytqanına köre, bütün raketalar Rusiye ava mudafaası sisteması tarafından tüşürildi.
Belousovnıñ aytqanları ücüm künü Ukrayina Silâlı quvetleriniñ Baş ştabınıñ bildirüvlerine zıt kele. Ukrayina arbiyleri o vaqıt ATACMS ücüminiñ Keriç parom keçitinde yapılğanını beyan etken edi, köpürde degil. Eki paromğa ciddiy zarar ketirildi, dep iddia etile. Olardan biri Keriç keçitiniñ işini toqtattı, dep bildire müessise.
ASTRA telegram kanalı yazğanına köre, Keriçke ücüm vaqtında "Konro Treyder" ve "Avangard" paromları zarar körgen.
Bundan ğayrı, ASTRA malümatına köre, mayısnıñ 30-na keçken gecesi Keriçke endirilgen raketa ücüminiñ neticesinde "Meçta" uçaq gemisi batqan.
Bundan da ğayrı, telegram kanalınıñ yazğanına köre, bu ücüm neticesinde "Tunets" tipli dört Rusiye QS 701 kateri yoq ettilgen. Ukrayina Mudafaa nazirliginiñ Baş istihbarat idaresinde bu kibi tek eki katerniñ bozulğanını tasdıqladılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
