Aprelniñ 11-nde içtimaiy ağlarnıñ qullanıcıları bildirgenine köre, Moskva regionınıñ bir qaç hastahanesi ögünde onlarnen «acele yardım» maşinasınıñ nevbetleri tura. Bu aqta Nastoyaşçeye Vremâ bildire.
Acele yardım tıqanıqlıqları Himkideki №119 hastahanesi ve Startovaya soqağında cenk veteranları içün Moskva gospitali ögünde qayd etildi.
Bundan ğayrı, qullanıcılar Moskvanıñ şimali-ğarbinde №52 şeer klinik hastahanesi ögünde ve cenüp-şarqındaki Demihov №68 hastahanesi ögünde maşinalar bar, dep bildire.
Koronavirus tarqaluvına qarşı operativ ştab acele yardım maşinalarınıñ nevbetleri «zor bir epidemiologik vaziyetnen» bağlı, dep tasdıqladı «RİA Novosti» neşirine.
«Soñki künleri hastalar kerçekten çoqlaştı», – dep bildirdi ştab. Hastalar hastahanege alınıp, kerekli yardım alacaq, dep işandıralar.
Aprelniñ 10-nda Moskva şeer yolbaşçısınıñ muavini Anastasiya Rakovanıñ bildirgenine köre, şeerniñ acele yardımı ve hastahaneleri tolusınen çalışa – Moskva akimiyetiniñ aytqanına köre, şeerde COVID-19 hastalığınıñ zirvesi daa başlanmadı. Moskvada kirişlik rejiminiñ ilân etilüvi ve regionlardan Rusiye paytahtına kirüv sıñırlavı sağlıq sistemasınıñ işini zorlaştırdı, dep aytalar.
Aprelniñ 11-nde berilgen malümatqa köre, Rusiyede koronavirus hastalarınıñ sayısı 13 584 insan oldı, 8552-si – Moskvada.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
