Moskva ava limanları eñ yüksek, üçünci «telükesizlik seviyesini» ilân etti. Bu obyekt içün doğrudan telüke, hususan – terror ücümi ihtimali bar demek. Bu aqta RBK neşiri Domodedovo ava limanınıñ matbuat hızmetine esaslanıp bildirdi. Qayd etilgenine köre, böyle telükesizlik rejimi paytahtnıñ ava limanlarında ilk sefer ilân etile.
Bir sıra kütleviy haber vastaları bildirgenine köre, Peterburgnıñ Pulkovo ava limanında da aynı tedbirler alına. Haber etilgenine köre, anda uçaqqa minmezden daa bir teşkerüv yapıla.
Oktâbr ayında Rusiye prezidenti Vladimir Putin Moskvanen beraber bir sıra Rusiye subyektinde «temel azırlıq seviyesini» ilân etti. Böylece, naqliyat, bağ, energetika obyektlerinde hususiy iş rejimi kirsetile, sakinler vaqtınca başqa yerge köçürile, hususiy kiriş-çıqış rejimi kirsetile, naqliyatnen areket etüv sıñırlana, naqliyat vastaları teşkerile.
Moskva şeer yolbaşçısı Sergey Sobânin o vaqıt şeerde vatandaşlar içün bir de bir sıñırlav olmaycaq, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
