Link açıqlığı

Saatnıñ esas haberi

Rusiye mayorı Kurbedinovnıñ «ekstremizmini» Facebookta sahte saifeden qıdırdı – jurnalist


Advokat Emil Kürbedinov

Rusiye politsiyasınıñ mayorı Ruslan Şambazov apiske alınğan advokat Emil Kurbedinovnıñ «ekstremizm» yazılarını Facebookta sahte saifeni qullanıp qıdırdı. Bu aqta jurnalist Anton Naumlük bildirdi.

Onıñ malümatına köre, Şambazov Rusiyeniñ Ekstremizm ile küreş merkeziniñ hadimi olıp, Kürbedinovğa qarşı eki memuriy davanıñ açılmasına teşebbüs köstergen edi.

Naumlükniñ qayd etkenine köre, Kurbedinov Facebookta «Eridan Gaziyev» olaraq saife açqan politsiya mayorı Şambazov ile «dostlaşqan edi». 72 ortaq «dostları» bar edi.

Şambazovnıñ bunıñnen bağlı açıq izaatları yoq. Qırım.Aqiqat oña muracaatta bulundı.

Kreml kontrolindeki Aqmescitniñ Kiyev rayon mahkemesi dekabrniñ 7-nde qırımlı advokat Emil Kurbedinovnı 5 künge tevqif etti.

«Çette qalmağa mümkün degil». Qırımtatarlar advokat Kürbedinovğa nasıl qoltuttı (video)
Bekleñiz, lütfen

No media source currently available

0:00 0:02:25 0:00

Kurbedinov 2013 senesi Facebookta paylaşqanları içün Rusiye Memuriy cinayetler kodeksiniñ 20.3 maddesi boyunca (natsist işaretleri ya da timsalleri, ekstremist teşkilâtlarnıñ işaretleri ya da timsalleri, ya da federal qanunlarnen yasaqlanğan işaret ve timsalleriniñ teşviqatı ve açıq numayış etilmesi) apiske alındı. Kürbedinovnıñ zenaatdaşları dey ki, onı Dimaşqqa köçken Qırım sakini şikâyet etti.

12 imayeci ve altı saat mahkeme: Kürbedinovnıñ davası nasıl baqıldı (video)
Bekleñiz, lütfen

No media source currently available

0:00 0:02:03 0:00

Kurbedinovnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kurbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.

Emil Kurbedinovnıñ advokatı Aleksey Ladin Aqmescitniñ Kiyev rayon mahkemesinde çıqışta bulunıp, cinayet olmağanı içün dava qapatılmalı, dedi. Ladin 2013 senesi Qırımda «Ukraina uquqı bar edi, oña köre bu timsaller yasaq altında degil. Cinayet işlemek kibi bir niyet de yoq edi», dep hatırlattı. Mahkeme adise eski olğanına baqmadan, memuriy davanı qapatmaq muracaatını red etti.

Emil Kurbedinovnıñ davasında şaatlardan biri Rusiye FSB hadimi Andrey Suşko ola. O, qırımtatar faali Renat Paralamovnıñ hırsızlanması ve azaplanmasında iştirak etken edi.

Keçenleri Suşko Paralamovnı hırsızlağanında şeklenip, ABD sanktsiyalar cedveline kirsetilgen edi.

İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.

XS
SM
MD
LG