Rusiye makemesi tarafından Qırımnıñ Saq rayonında Rusiye kontrolindeki Puşkin köy şurasınıñ binasını ateşke berüvde qabaatlanıp, üç yıl koloniyada qalmasına maküm etilgen Aziz Fayzullayev azatlıqqa çıqtı. Bu aqta "OVD-İnfo" aq qorçalayıcı leyhası yaza.
Aq qorçalayıcılarğa qırımlınıñ yazışuv subetdeşiniñ bildirgenine köre, qara qış ayınıñ başında o, Fayzullayevge mektüp yollağan, onı Keriçteki 2-nci koloniya poçta vastasınen "Azatlıq etilgen" işaretinen qaytarğan.
Aq qorçalayıcılar onıñ bulunğan yerini aydınlatmadı.
2022 senesi rus telegram kanalları bildirgenine köre, Qırımda belli olmağan şahıs Puşkino köyüniñ Rusiye memuriyetiniñ binasına yanıcı qarışıq ile şişeni atqan edi.
Cinaiy davanıñ malümatına köre, 2022 senesi ilk yaz ayınıñ 5-nde gece Fayzullayev "içken alda olıp, köydeki memuriyetiniñ binasını ateşke berdi, neticede odanıñ birinde sistem bloku, kompyuterniñ monitorı ve siçanı, masa, dolap, kürsü, em de divarlardaki plakatlar zarar kördi". Tahqiqat tarafından belgilengen zararnıñ umumiy miqdarı 103 biñ ruble.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
