Herson vilâyetiniñ işğal etilgen qısmında Rusiye makemesi hırsızlanğan ve Qırımğa alıp ketirilgen Anna Yeltsovağa 10 yıl apis cezasını berdi. 23 yaşındaki qıznı Rusiye arbiy tehnika ve Rusiye arbiyleriniñ yerleşüv yerleri aqqında malümat toplağanında qabaatladılar, dep bildire "Most" neşri.
"Herson vilâyetiniñ vaqtınca işğal etilgen territoriyasında Ukrayina vatandaşı Anna Yeltsova casuslıqta qabaatlanıp, 10 yılğa azatlıqtan marum etildi", — dep aytıla haberde.
Rusiye prokuraturasınıñ malümatına köre, 2022 senesi noyabr ayında Geniçesk rayonınıñ sakini Rusiye arbiy tehnikasınıñ areket etüvi ve Rusiye arbiyleriniñ bulunğan yeri aqqında malümat toplap, Ukrayina istihbaratına yardım ete edi.
Qayd etilgenine köre, Rusiye quvetçileri Yeltsovanı 2022 senesi qışta Geniçesk rayonındaki evinden alıp kettiler. Qıznı işğal etilgen Aqmescitniñ tahqiqat izolâtorında qorantası ve tış dünyasınen bağsız tuta ediler, dep qayd ete "Most".
Qırım aq qorçalayıcı gruppasınıñ malümatına köre, Rusiyede eñ az 17 vatandaş qadın tutula. Bu qadınlar ya Qırımdan, ya Herson vilâyetinden, ya da Zaporojjâ şeerinden. Olarnıñ episi tibbiy yardımğa muhtac olğan vatandaşlar, bazıları ağır hastalıqlarnen, şu cümleden onkologiya ile, hastalar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
