"Makeme, 2022 senesi sentâbr ayından 2023 senesi oktâbr ayına qadar Aqmescitte bulunğan erkek, Ukrayina telükesizlik hızmetiniñ vekili ile bağ qurıp, işbirlik yapmağa azır olğanını bildirdi", — dep aytıla haberde.
Maküm etilgen adam gizliden SIM-kartlarnı çıqardı, olarnı az adam olğan yerde yerleştirdi, koordinatları ve fotoresimlerini Ukrayina telükesizlik hızmetiniñ hadimine berdi.
"Makeme, devlet qabaatlayıcısınıñ fikrini köz ögüne alıp, qabaatlı kişini 4 yılğa azatlıqtan marum etti ve 300 biñ ruble para cezasını berdi", — dep bildirdi Rusiye prokuraturası.
Maküm etilgenniñ ya da advokatınıñ açıq izaatları yoq. SBU Rusiye mahkemesiniñ qabaatlavlarını daa izaatlamadı.
Dekabrniñ 11-nde Rusiye kontrolindeki Aqyar şeer mahkemesi devlet hainligi davası boyunca 48 yaşında yerli sakinni 13 yılğa azatlıqtan marum etti. Onı RF ordusınıñ obyektleri ve tehnikasınıñ fotoresimlerini çeküvde ve olarnıñ bulunğan yeri aqqında malümatnı ukrain arbiylerine berüvde qabaatladılar.
Ukrayinağa tam mıqyaslı istilâdan soñ Rusiyede ve işğal etilgen topraqlarda cenkke qarşı çıqqanlar kütleviy surette taqip etile. 2023 senesi Rusiye Federatsiyasında eñ az 98 insan devletke qarşı cinayet işinde, 31 kişi casuslıqta, 19 kişi ecnebiylernen işbirlikte bulunğanında qabaatlandı. Mahkemelerge eñ azından 88 dava keldi, ve olardan 50-ne qabaatlav qararı çıqarıldı, dep bildire Sibir.Aqiqat.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
