Rusiye mahkemesi tarafından 13 yıl sert rejimli koloniyada qalmasına üküm etilgen «qırımlı musulmanlar davasının» mabüsi Oleg Fedorov Rusiyeniñ Lipetsk vilâyetindeki Yelets şeerinde berilgen aşta domuz eti bar, dep tarif etti. Bu aqta «Qırım birdemligi» advokatnıñ malümatına esaslanıp haber ete.
«Qırımlı apishanedeki aş «aynı», dep ayttı. Domuz eti sıq-sıq berile, bazı vaqıtları malzemeler etnen qarıştırılğanı içün ne olğanını añlamaq mümkün degil. Şunıñ içün Fedorov diniy baqışları sebebinden aş aşamay», – dep aytıla haberde.
Fedorovnıñ ömür arqadaşı İrinanıñ aytqanına köre, aqayı Yeletske avuştırılğan 2023 senesi sentâbr ayından başlap o, eki kere yollanma aldı: noyabr ayında, uzun körüşüv vaqtında, ve yanvar ayında, poçtanen. Oña yılda bir kere poçtanen yollanma kele bile. Fedorov bu yıl noyabr ayına qadar bir şey alıp olamaz. Şimdi qorantası yollağan parağa apishane tükânından bir şeyler almağa mecbur.
Bundan evel Fedorov közleri zayıflaşqanını ve azğanını bildirgen edi.
Oleg Fedorov – Bağçasaraylı iş adamı. O, siyasiy sebepli davalarnı ziyaret etken, qırımtatar siyasiy mabüslerine qoltutuv kampaniyalarında iştirak etken edi. Siyasiy mabüslerniñ ailelerine maddiy yardım köstergen edi.
2021 senesi fevralniñ 17-nde Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
