Şimaliy Kavkaz arbiy mahkemesinde, iştirakçisi Enver Seytosmanov olğan, Aqyar "Hizb ut-Tahrir davası"nıñ birinci oturışı keçirildi.
Bu hususta advokat Emil Kurbedinov aytıp berdi, dep bildire "Qırım birdemligi" birleşmesi.
"İmaye tarafı, Enver Seytosmanovnıñ anketa malümatında, o, Ukraina vatandaşı olğanı aqqında qaydlarnı körmedi. Biz nege diqqat ettik... Seytosmanovnıñ ağası Ernes sorğuğa çekildi. O, ne içündir, qabaatlav şaatı kibi celp etildi. Oturışnıñ çoqusı - bu audio yazuvnıñ diñlenmesi edi. Audioda Enver Seytosmanov, Adnan degen adamnen körüşip, umumiy islâm mevzularını ve başqa meselelerni muzakere etti', - dep aytıp berdi Kurbedinov.
Advokatnıñ aytqanına köre, nevbetteki oturış avgustnıñ 20 ve 21-isine tayinlendi, anda qabaatlav tarafı öz delilleriniñ köstermegini devam etecek.
İyülniñ başında Rostov-na-Donu mahkemesi, video alâqasınen Seytosmanovnıñ tevqif müddetini dekabrniñ 20-sine qadar uzattı.
İyülniñ soñunda ise Enver Seytosmanovnı Aqmescit SİZOsından Rostov-na-Donu şeeriniñ SİZOsına etep ettiler.
Rusiye quvetçileri, ağa-qardaş Ernes ve Enver Seytosmanovlarnı 2018 yılı mayıs 10-unda Aqyarnıñ Balıqlava rayonınıñ Hayto (Tılovoye) köyünde, tintüvlerden soñ tutıp aldılar.
Ernesni soñra yiberdiler, Enverge ise cinaiy dava açılğanı aqqında qarar berildi.
