Rusiye Federatsiyası qurğan Qırım Yuqarı mahkemesi Rusiye kontrolindeki Aqmescit Kiyev rayon mahkemesiniñ qırımlı faaller Aziz Azizov, Rustem Osmanov ve Mustafa Abduramanovnıñ apis cezası qararını lâğu etmedi. Bu aqta «Qırım birdemligi» haber ete.
Advokat Edem Semedlâyev diger qırımlı Memet Lümanovğa qarşı aynı qararnı böyle izaatladı.
«İç bir delilge mahkeme qulaq asmadı. Kiyev mahkemesiniñ qararı deñişmedi. İstinaf şikâyetimiz red etildi. Tek bir şey bar – müvekkilimnen körüşip oldım. Videokonferentsbağı olsa da. Laf ettik. Alı bir qarar. Ekinci tahqiqat izolâtorında buluna, şaraitler sert. Apishane kibi. İnsanlar daa qabaatlı tanılmasa da – tek qabaatlanğanlar ola – qabaatları isbatlanmağan, lâkin olarğa ilk künden cinayetçilerge kibi yanaşalar», – dedi advokat.
Martnıñ 5-nde saba Qırımda qırımtatarlarnıñ evlerinde kütleviy tintüvler oldı. Bağçasarayda tahqiqat tedbirleri «Qırım birdemligi» faalleriniñ evlerinde, Canköy rayonında ise din adamlarınıñ evlerinde keçirildi. Tintüvler 10 qırımtatarınıñ evinde yapıldı.
Tintüvlerden soñ FSB eñ az beş insannı tuttı, aralarında sabıq imam Remzi Kurtnezirov bar. O, ekinci derece saqatıdır.
Neticede Rusiye kontrolindeki Aqmescitniñ Kiyev rayon mahkemesi qırımtatar faalleri ve vatandaş jurnalistileri Memet Lümanov, Aziz Azizov, Rustem Osmanov ve Mustafa Abduramanovnı 2024 senesi mayısnıñ 4-ne qadar SİZOda qaldırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
