Cenübiy okrugınıñ arbiy mahkemesi dekabrniñ 4-nde «Hizb ut-Tahrir davalarından» biriniñ mabüsi Zekirya Muratovnı №1 Rostov-na-Donu SİZOsına konvoylıq etmege avale etti.
Bu aqta advokatlar Emine Avamileva ve Lilâ Gemeci «Qırım birdemligine» bildirdi. Konvoylıq sebebi belli degil.
Advokat Avamileva Muratovnıñ sağlıq vaziyetinden qasevetlene. Onıñ aytqanına köre, o, öksüre, amma koronavirus talillerini kimse almadı. Onıñ qayd etkenine köre, Muratovnıñ apiske alınğanından berli tutulğan Aqmescit tahqiqat izolâtorınıñ kamerasında karantin lâğu etildimi belli degil.
Noyabrniñ 26-nda Rusiyeniñ Rostov-na-Donu Cenübiy okrugınıñ arbiy mahkemesi Zekirya Muratovnıñ apiste tutuv müddetini 6 ayğa – 2021 senesi mayısnıñ 17-ne qadar uzattı.
Rusiye quvetçileri Zekirya Muratovnı iyülniñ 7-nde tuttı. FSB, onı «Hizb ut-Tahrir» bölüginde iştirak etkeninde qabaatlay.
Rusiye quvetçileriniñ areketlerini Ukraina prezidentiniñ Qırım Muhtar Cumhuriyetindeki daimiy temsilciligi takbih etti, Qırım Muhtar Cumhuriyeti ve Aqyardaki Milliy politsiya Baş idaresi tintüvler aqqında Ukraina Ceza kodeksiniñ 162-nci maddesiniñ 2-nci qısmına (mesken tiyilmemezligini bozuv) ve Ukraina Ceza kodeksiniñ 146-ncı maddesiniñ 2-nci qısmına (qanunsız alda azatlıqtan marum etüv) istinaden cinaiy tahqiqat başlattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
