Rusiyeniñ Üçünci istinaf mahkemesi "casuslıq" davası boyunca mahküm etilgen Yañı Kahovkadan jurnalist Serğiy Tsiğipanıñ ükmüni ğayrıdan baqmağa razı olmadı. Bu aqta ''Qırım esnası'' mahkemeniñ resmiy saytına atıp etip bildire.
Qayd etilgenine köre, mabüsniñ soyadı qayd etilmey, lâkin talil, rusiyeli mahkemeci Viktor Sklyarov 2023 senesi oktâbrniñ 6-nda ükümni ilân etkenini kösterdi.
''O künü Qırım Yuqarı mahkemesiniñ matbuat hızmeti haber etti ki, Yañı Kahovkadan jurnalist Serğiy Tsiğipa qabaatlı tanıldı... O künü Qırım mahkemesinde Rusiye Federatsiyası Ceza kodeksiniñ 276-ncı maddesine istinaden diger davalar baqılmadı'', - dep qayd eteler uquq qoruyıcılar.
Oktâbrniñ 6-nda haber etilgenine köre, Kreml kontrolindeki Qırım Yuqarı mahkemesi "casuslıq" davası boyunca Yañı Kahovkadan jurnalist Serğiy Tsiğipanı 13 yılğa azatlıqtan marum etti.
Serğiy Tsiğipa - jurnalist, faal ve Yañı Kahovkadan ATO veteranı. Rusiye istilâsı başlağanından berli o, göñülli faaliyetnen oğraşa, Ukrayinağa qoltutuv mitinglerinde iştirak ete ve cenüpte Rusiye areketleri aqqında haber ete edi.
O, keçken sene martnıñ 12-nden berli esirlikte buluna. Vatandaş serbestligi Merkeziniñ malümatına köre, 2022 senesi fevralniñ 24-nde o, "Yañı Kahovkanıñ informatsion öz-özüni mudafaası" leyhasını meydanğa ketirdi.
Serğiy Tsiğipanıñ bulunğan yeri çoq vaqıt belli degil edi. Uquq qoruyıcılarnıñ malümatına köre, keçken sene oktâbr ayında faalniñ Aqmescit SİZO-sında tutulğanı belli oldı. Daa soñra, Tsiğipanı Aqmescitteki yañı SİZO-ğa avuştırğanları aqqında haber etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
