Rusiye kontrolindeki Qırım Yuqarı mahkemesi, Rusiye quvetçileri tarafından "devlet hainliginde" qabaatlanğan 49 yaşındaki Yaltalı aqaynı 18 yıl sert rejimli koloniyada qalmasına üküm etti, dep bildire mahkeme matbuat hızmeti.
"Mahkeme, mahkümniñ areketlerini, Rusiye Federatsiyası Cinaiy kodeksiniñ 275 maddesi — devlet hainligi, yani Rusiye Federatsiyası vatandaşı tarafından yapılğan casuslıq — Rusiye Federatsiyası organlarına qarşı qullanıla bilecek malümatnı berüv ve toplav, başqa areketler şaraitlerinde yapılğan, Rusiye Federatsiyası iştirak etken silâ ve arbiy tehnika qullanılğan", — dep aytıla haberde .
Mahkeme toplaşuvı qapalı şekilde keçti. Mahküm etilgenniñ adı ve soyadı aytılmay, onıñ açıq mevamı da yoq. Mahkemede başqa tafsilâtlar berilmedi.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı Qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar tutula ve Rusiye ordusını "itibardan tüşürüv" içün memuriy ve cinaiy mesüliyetke çekile.
Aq qorçalayıcılar, Qırımda Rusiye quvetçileri tarafından açılğan devlet hainligi, Ukrayina ile işbirligi, casuslıq ve diversiya maddeleri boyunca davalarnıñ sayısı artacağını tahmin eteler. Şimdi FSB bu kibi davalarnı aman-aman er kün aça, 2014 senesine qadar ise yılda 10 dava açıla edi.