Rostov-na-Donudaki Rusiyeniñ Cenübiy okrugınıñ arbiy mahkemesi, vatandaş jurnalisti Ernes Ametovğa qarşı açılğan davanıñ ğayrıdan baqılğanından soñ qabaatlanğan şahısnı 11 yıl sert apis cezasına mahküm etke. Bunı "Qırım birdemligi" cemaat birleşmesi haber ete.
Bundan ğayrı, azat etilgen soñ Ametovğa Qırım territoriyasını terk etmege, içtimaiy tedbirler teşkil etmege ve olarda iştirak etmege, RF FSİN izni olmadan yaşayış yerini deñiştirmege, aqşam saat 10-dan saba saat 6-ğace evden çıqmağa yasaq olacaq. Ayrıca, qaydiyet içün ayda eki kere kösterilgen qurumğa kelmek kerek olacaq.
"Men dindar adamım ve öz taqdirimni qabul etem. Şunı aytmaq isteyim ki, mında yüz bergenlerni Allah qısmet etti. Yani bu onıñ istegidir. Men itaat etem, Seniñ er angi ükmüñ adaletli olacaq. Amma menim üstüme atılğan yalan qabaatlavlarnı red etem ve şunı aytmaq isteyim ki: bugün siz üküm çıqarasıñız, Allah da öz ükmüni çıqaracaq. Sağ oluñız", - dedi Ametov mahkemedeki soñki sözünde.
Ernes Ametov 2017 senesi oktâbrniñ 11-nde Seyran Saliyev, Marlen Asanov, Timur İbragimov, Server Zekiryayev ve Memet Belâlovnen beraber tintüvlerden soñ tutuldı. 3 yıl devam etken tahqiqat ve mahkemelerni qırımlı Qırım ve Rostov-na-Donu tahqiqat izolâtorlarında keçirdi.
2020 senesi onı aqlap, deliller yetmegeni içün mahkemede azat ettiler. «Hizb ut-Tahrir davasında» böyle bir vaqia em işğal etilgen Qırımda, em qomşu Rusiyede ilk oldı. Lâkin 2022 senesi mart ayında istinaf mahkemesi Cenübiy okrugınıñ arbiy mahkemesi çıqarğan qararnı yañıdan baqıp, davanı yañıdan baqılmasına yolladı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
