Rusiyeniñ Vlasiha şeerindeki İstinaf arbiy mahkemesi qırımtatar cemaat jurnalisti Ernes Ametovnıñ 11 yılğa azatlıqtan marum etilüv cezasını deñiştirmedi. Bu aqta "Qırım birdemligi" haber ete.
Onıñ apayı Eleonora Ametova bu ükümni dindaşlarına iftira atmaqtan vazgeçkeni içün Rusiye mahsus hızmetiniñ intiqamı olaraq saya.
"Ernes dindar bir insandır. O, Allahqa ve ayat qaidelerine sadıqtır. O, red etkende, oña dediler ki: "Demek, sen de er kesnen beraber oturacaqsıñ!" - dep ayttı o.
"Mahkeme maña konserva qapularını yuvarlağan konveyerni hatırlattı, mükemmelleştirilgen esnas. Sanki olar insan taqdirini belgilemeyip, daa bir teneke qutusını yuvarlaylar. [Mahkeme içün] şahsiy bir şey degil, sadece iş", - dep qayd etti Ametov.
Ernes Ametov 2017 senesi oktâbrniñ 11-nde Seyran Saliyev, Marlen Asanov, Timur İbragimov, Server Zekiryayev ve Memet Belâlovnen beraber tintüvlerden soñ tutuldı. 3 yıl devam etken tahqiqat ve mahkemelerni qırımlı Qırım ve Rostov-na-Donu tahqiqat izolâtorlarında keçirdi.
2020 senesi onı aqlap, deliller yetmegeni içün mahkemede azat ettiler. «Hizb ut-Tahrir davasında» böyle bir vaqia em işğal etilgen Qırımda, em qomşu Rusiyede ilk oldı. Lâkin 2022 senesi mart ayında istinaf mahkemesi Cenübiy okrugınıñ arbiy mahkemesi çıqarğan qararnı yañıdan baqıp, davanı yañıdan baqılmasına yolladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
