Episi salı künü Rusiye uquq qoruyıcıları Bağçasarayda keçirgen tintüvlerde tutuldı.
«Mahkeme qararın razı degiller ve şikâyet etecekler. Saba 4-ten berli ayaqtalar, oturmağa izin berilmedi. Şimdi olarnı Aqmescitniñ SİZO-2-ne yollaycaqlar, tahqiqat vaqtında anda qalacaqlar», – dep tarif etti advokat Edem Semedlâyev.
Bu mahkeme «Qırım birdemliginiñ» vatandaş jurnalisti Rustem Osmanovnı da apiske aldı.
Memet Lümanov, Aziz Azizov, Rustem Osmanov ve Mustafa Abduramanov – mahkeme oturışuvlarına muntazam sürette kelgen faaller, qırımlı siyasiy mabüslerniñ qorantalarına yardım etken ediler. Dördü de bundan evel Rusiye uquq qoruyıcıları tarafından tutulğan ve mahküm etilgen dindaşlarına birdemlik köstergenleri içün memuriy mesüliyetke çekilgen ediler.
Martnıñ 5-nde saba Qırımda qırımtatarlarnıñ evlerinde kütleviy tintüvler oldı. Bağçasarayda tahqiqat tedbirleri «Qırım birdemligi» faalleriniñ evlerinde, Canköy rayonında ise din adamlarınıñ evlerinde keçirildi. Tintüvler 10 qırımtatarınıñ evinde yapıldı.
Tintüvlerden soñ FSB eñ az beş kişini tuttı, olarnıñ arasında sabıq imam Remzi Kurtnezirov bar. Kurtnezirov ekinci derece saqatıdır.
Rusiye uquq qoruyıcıları martnıñ 5-nde tutulğan qırımtatarlarnı terror teşkilâtında iştirak etkeninde qabaatladılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
