Rusiye mahkemesi tarafından casuslıqta qabaatlanıp 12 yılğa üküm etilgen 71 yaşındaki Qırımlı Galina Dovgopolayağa buğum ameliyatı kerek. Bunı o, jurnalist ve Kremlniñ sabıq mabüsi Vladislav Yesipenkoğa yazğan mektübinde bildirdi.
"Menim içün eñ qorqunçlısı bu yerniñ iklimidir. Bu qış suvuq edi ve suvuq altı ay devam etti! Bir daa böyle bir şeyge dayanamam, lâkin iç bir vaqıt bunı köstermeyim. Ruh qaviyligimnen er şey yahşı, bir gramm da eksilmedi, ve yaş olğanıma baqmadan, öz printsiplerime sadıq qaldım. Mında gençler arasında çoq dostlarım bar, ve soñki dört buçuq yıl devamında maña olğan munasebetleri pek deñişti. Belki de, niayet samimiyligime inandılar. Er şey keçken kibi körüne edi. Elbette ki, ne qadar tırışsam da, şartlı apis cezasını ya da koloniya-qasaba cezasını qullanıp olamaycağım. Şimdi acele surette buğum deñiştirmek içün ameliyat kerek. Men bellesem, bu kvotağa köre olmaycaqtır", — dep yazdı Dovğopolaya.
O, Rusiye vatandaşlığından vazgeçüv muracaatını bergenini ve azat etilgen soñ Qırımğa qaytmaq niyetinde olmağanını bildirdi.
Rusiye kontrolindeki Aqyar şeer mahkemesi, 2021 senesi Sabannıñ 24-nde Dovgopolaya sert rejimli koloniyağa mahküm etildi, dep bildirdi. Mahkeme matbuat hızmetiniñ bildirgenine köre, cinaiy iş qapalı şekilde baqıldı, çünki "iş malümatlarında devlet sırı olğan malümat bar edi".