Rusiye mahkemesi tarafından mahküm etilgen "Qırım musulmanları davası"nıñ figurantı Timur Yalkabovda gepatit tapıldı. Bu aqta "Qırım birdemligi" cemaat birleşmesine onıñ qadını Aliye Yalkabova bildirdi.
Berilgen malümatqa köre, Yalkakov oña diagnozı aqqında "Zonatelekom" resmiy bağ vastasınen bağlanğanda ikâye etken.
"O, telefon etip, gepatit tapılğanını bildirdi. Qaysı biri olğanını aytmadı. Tek tekrar teşkerüvlerni keçti ve neticelerini bekley, dep ayttı. O maña pek sarı köründi", — dedi siyasiy mabüsniñ qadını.
Tibbiy hastalıqtan ğayrı, Timur Yalkakovnıñ hronik astması bar ve bu sebepten üçünci gruppa saqatlığı bar. Erkekni 2025 senesi çeçek ayında Murmansk koloniyasına etap ettiler.
2021 senesi fevralniñ 17-nde Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayinada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
2022 senesi saban ayınıñ soñunda Rostov-na-Donu şeeriniñ Cenübiy okrug mahkemesi Qırımtatar faali Timur Yalkabovnı Rusiyede yasaq etilgen, amma dünyanıñ çoqusı memleketlerinde izin berilgen "Hizb ut-Tahrir" teşkilâtınıñ faaliyetinde iştirak etkeninde qabaatlap, 17 yıl koloniyada qalmasına üküm etti.