Rusiye mahkemesi tarafından 29 buçuq yılğa azatlıqtan marum etilgen Qırımlı ukrayin deñiz askeri Ekender Kudusov yaqında Makiyivkadaki SİZO-dan Donetsk vilâyetiniñ Rusiye kontrol etken qısmındaki Kırovske şeerindeki 8-nci tüzetüv koloniyasına avuştırıldı. Bu aqta Qırımtatar resurs merkeziniñ idarecisi Zarema Bariyevanıñ Facebook saifesinde haber etile.
"Merametsiz işğalciler, işkence, mahkeme... 2023 senesi Eskenderni 25 yılğa işkence odasına yolladılar, bir yıl soñ, 2024 senesi, Ukrayina qoruyıcısı Kününde, apis müddeti 29,6 yılğa qadar arttırıldı. Eskenderniñ temyiz mahkemesi Moskvada onıñ şahsiy iştiragi olmadan keçti, anda apis müddeti deñiştirilmedi. 3 yıl ve 6 aydan berli Eskender Kudusov esirlikte buluna. Bütün bu vaqıt devamında Eskender Donetsk vilâyetiniñ işğal etilgen Makiyivka SİZO-sında buluna edi, yaqında ise Donetsk vilâyetiniñ Korovske şeerindeki SİZO-sına avuştırıldı", — dep yazdı Bariyeva.
Qırımtatar resurs merkeziniñ idarecisi Zarema Bariyeva Ukrayina akimiyeti "Eskender Kudusovnı azat etmek içün er şey yapacağına" ümüt etkenini bildirdi.
41 yaşındaki Eskender Kudusov sürgünlik yerlerinden qorantasınen beraber Qırımğa qaytqan soñ, 18 yaşından ukrayin ordusında hızmet etmege başladı. Zaporojjâ şeerinde hızmet etti. 2004 senesi ukrayin sulh kontingentiniñ erkânında İraq cumhuriyetinde 10 ay devamında hızmet etti, 2009 senesi ise 9 ay devamında Kosovo cumhuriyetinde hızmet etti. 2014 senesine qadar Qırımdaki Kefede deñiz piyadesi olaraq hızmet etti. 2014 senesi o, Rusiye tarafına keçmekni red etti ve Mıkolayivde deñiz piyade hızmetini devam etti.
Kudusov keñ kölemli basuvnıñ başında Donetsk vilâyetinde hızmet ete edi, Mariupol rayonında vazifelerni eda etti. Bariyevanıñ yazğanına köre, 2022 senesi çeçek ayında Eskender dört insandan ibaret gruppa ile 26 km yürıp, qamaçavdan çıqmağa tırıştı, amma çeçek ayınıñ 16-nda esir alındı.
