Rusiye mahkemesi tarafından 14 yılğa azatlıqtan marum etilgen "Qırım musulmanları davasınıñ" mabüsi Rustem Seythalilov altı yıl apis cezasında ilk sefer anasınen körüşti. Bunı Rustemniñ ömür arqadaşı Elzara Seythalilova Facebook saifesinde bildirdi.
Onıñ aytqanına köre, bu yanvarniñ 18-nde — qırımtatarnıñ 41-inci doğğan kününde olan.
"Rustemniñ doğğan kününde, Yüce Allahnıñ iradesi ile, onıñ anası, niayet, ilk sefer oğlunı quçaqlap oldı. Altı yıl devamında böyle imkânı yoq edi. Üç kün beraberlikte Petrozavodsk şeerinde İK-9da uzun müddetli körüşüvde bulundıq. Bu şeerge ilk sefer keldik", — dep yazdı ömür arqadaşı.
Onıñ aytqanına köre, Seythalilovnıñ sağlıq vaziyeti apiste fenalaşa. Rustemni baş ağrısı sıq-sıq raatsızlay, uzun bir körüşüvden soñ bütün kün devamında başı ağırdı.
"Bundan da ğayrı, bel ağrısı bar, cezahanede 5 kün devamında ineler yapıldı, amma faydası olmadı. Bu şikâyetlerni Rustemden alıp oldım. Aqayım bizden bunı saqlamağa tırışa edi ve er şey yahşı olğanını ayta edi. Amma onıñ körünişinden sağlıq vaziyeti deñişkenini kördim. Rustem, iç de layıq olmağan qıyın rejimge alışmağa tırışa", — dep qoştı Elzara Seythalilova.
Rustem Seythalilov – «Qırım birdemliginiñ» faali. Apiske alınmazdan evel Qırımda siyasiy mabüslerniñ qorantalarına yardım etken, mahkemelerge barğan, SİZOğa yollanmalar yapqan, diniy bayramlarnıñ keçirilüvine yardım etken edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2023 senesi martnıñ 18-nde Rusiyeniñ Rostov-na-Donu mahkemesi «Qırım birdemliginiñ» beş faaline üküm çıqardı. Qırımtatar faalleri Akim Bekirov, Seytveli Seytabdiyev, Rustem Seythalilov 14 yılğa, Eskender Suleymanov veAsan Yanikov 15 yılğa koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
