Rusiye mahkemesi tarafından "ZSU-nı paranen temin etkeni" içün yedi yılğa azatlıqtan marum etilgen qırımlı Appaz Kurtamet Nizhniy Novgorodda etapta buluna. Bu aqta "Suspilne Krım" siyasiy mabüsniñ anası Ayşe Kurtametke atıf etip yaza.
"Tek onıñ noyabrniñ 23-nde azat etilgenini bilem. O, ketti ve advokatqa Nizhniy Novgorodda olğanını ve eki afta devamında anda olacağını bildirdi. İlerideki yol belli degil, soñki bulunğan yeri, soñki noqtası da belli degil", — dep ayttı Ayşe.
Keçken afta Appaznıñ anası, oğlu eki aftadan berli bağğa çıqmağanını bildirgen edi.
2023 senesi aprelniñ 20-nde Aqmescitniñ Kıyiv rayon mahkemesi, 2022 senesi iyül ayında Herson vilâyetiniñ memuriy sıñırından hırsızlanğan Appaz Kurtametni 7 yıl sert rejimli koloniyada qalmasına üküm etti.
Refat Çubarovnıñ malümatına köre, 2022 senesi iyülniñ 23-nde Kurtamet Herson vilâyetiniñ Geniçesk rayonındaki Novoalekseyevka qasabasından ilhaq etilgen Qırımğa, tuvğanlarına ketti. Onıñ Qırım ve Herson vilâyeti arasındaki memuriy sıñırdaki Rusiye keçiş noqtasına sağ-selâmet kelgenini bilemiz. Bundan soñra Kurtametniñ tuvğanları ile bağları kesildi. Bundan soñ onı Rusiye quvetçileri yaqaladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
