Rusiye mahkemesi tarafından casuslıq yapqanı içün mahküm etilgen 71 yaşındaki Qırımlı Ğalına Dovğopola Rusiye apishanesinde insultqa oğradı, dep bildire Qırım.Aqiqatnıñ jurnalisti Vladislav Yesipenko Facebook saifesinde.
"Bizim eñ yaşlı siyasiy mabüsimiz — Ğalına Dolğopola yaqında infarkt keçirdi. O, biraz hastahanede tutuldı, amma bu sene Oraqnıñ 5-nde apishanege qaytarıldı. O, öz başına areket etip olamay ve saqat arabasına muhtac. Kelecek qışta sağ qalmaycağını yaza", — dep yazdı Yesipenko.
Esipenko, Rusiye mahkemesi tarafından devlet hainligi içün mahküm etilgen Qırımlı İvan Yatskinniñ de sağlıq vaziyeti fenalaşqanını bildirdi.
"Siyasiy mabüs İvan Yatskinniñ qadını maña mektüp yazdı. İvan çılğınlıq yapa, dep ayta. Yıllar devamında Ukrayin tarafdarı olğan adam, insaniyetsiz şaraitler sebebinden kerçekliknen alâqasını coya. Onıñ fikirleri qarışa, metinler añlaşılmay", — dep aytıla Esipenkonıñ yazısında.
O şunı da yaza ki, 2021 senesi Aqmescit SİZO-sında Yaçkin, ayağı bağlanğan, koridorğa çıqa edi.
"Nasılsıñız?" sualine "Bir şey degil, yavaş-yavaş çürüymiz" dey edi. Beş yıl keçti, ve Vanâ alâ daa çürmekte... onıñ ayaqlarında progressiv trofik ülserler bar. Bundan da ğayrı, o maña 2019 senesi tutulğanından soñ ilk altı ay devamında bir şey hatırlamağanını ayttı, çünki oña iradesini bastırğan bir şey aşıladılar. Yani olar onıñ aqılını aselet bozıp, küçlü aqaynı ve üç balanıñ babasını tiri kölgege çevirmek isteyler", — dep qoştı Yesipenko.
Rusiye Federatsiyasınıñ Cezalarnı yerine ketirüv federal hızmeti bu malümatnı izaatlamadı.