Rusiyedeki Krasnoyarsk vilâyet mahkemesi "Qırım musulmanları davası"nıñ kör figurantı Aleksandr Sizikovnıñ azat etilmesi aqqında qararnı lâğu etip, onı Qırımdaki evinden apiske qaytarmaqnı emir etti. Bu aqta "Qırım birdemligi" cemaat birleşmesi advokat Nazim Şeyhmambetovğa atıf etip haber etti.
Haberge köre, istinaf mahkemesi Rusiye prokuraturasınıñ arizasını qabul etken. Lâkin Rusiyeniñ Krasnoyarsk vilayetinde qoyulğan diagnoz Sizikov körüv qabiliyetini bütünley coyğanı apishanede tutmağa mania olğan şart olaraq qayd etilgenini köz ögüne alınğanda, qabaatlav tarafınıñ bu qararını teminlemek içün delilleri bellisiz qala.
Sizikovnıñ özü "Suspilne Qırım"ğa bu qarar onıñ içün şaşırtucu olğanını ayttı. O, böyle qararnıñ alınmasına dair sebepler aqqında bir şey bilmey eken, çünki vesiqanıñ tolu metnini almağan, tek soñki qısmını alğan.
"Biz daa şok içindemiz. Episi öyle beklenilmegen alda olıp keçti. Bugünki künge başqa planlarım bar edi. Şimdige qadar mahkemeniñ qararında tek soñki qarar yazılğan — birinci instantsiyanıñ qararını lâğu etmek ve meni apiske almaq. Biz daa sebebini bilmeymiz — bu qararnıñ tolu metini beklenile", — dedi Sizikov.
"Qırm birdemliginiñ" qayd etkenine köre, yaqında aynı vaziyetke "Aluşta" din cemiyetiniñ sabıq başı Lenur Halilov oğrağan. Arma ayında sağlıq vaziyeti sebebinden onı apis cezası ev apsine deñizşken edi, şimdi ise bu qarar lâpu etilgen ve o, apishanege qaytmaq kerek olacaq.
Hatırlatmamız ki, bu seneniñ quralayında Krasnoyarsk vilzyetiniñ Minussinsk şeer mahkemesi Sizikovnı bütünley körüv qabiliyetini coyğanı sebebinden apishaneden azat etken edi.
