Link açıqlığı

Saatnıñ esas haberi

Rusiye mahkemesi Qurman "Hizb ut-Tahrir davası" iştirakçileriniñ tevqifini yarım yılğa uzattı


Rustem Emiruseinov, Arsen Abhairov ve Eskender Abdulganiyev

Rostov-na-Donu şeerindeki Cenübiy okrugınıñ arbiy mahkemesi Qurman "Hizb ut-Tahrir davası" iştirakçileriniñ tevqifini yarım yılğa uzattı. Böyleliknen, Rustem Emiruseinov, Arsen Abhairov ve Eskender Abdulganiyev 2020 yılı iyün 13-üne qadar SİZOda tutulacaq.

Bu aqta advokat Edem Semedlâyev Qırım.Aqiqat mühbirine bildirdi.​

Dava azaları oturışta Aqmescit SİZOsından video alâqa ile iştirak etti.

"Tevqifni yarım yılğa uzattılar. Bu, esaslı diñlevlerge azırlıq yapılğanda sıq-sıq ola, mahkemeniñ böyle müddetke uzatmağa aqqı bar", - dedi advokat.

O qoştı ki, dava iştirakçilerini Rostov-na-Donuğa etapqa azırlaylar.

"2020 yılı yanvar 9-ında bu dava boyunca ilk diñlev keçirilecek, olar da Aqmescitten video alâqası ile iştirak etecek, soñra, bellesem, etap başlanacaq. Bu üç künden bir qaç ayğace sozula bile", - añlattı advokat.

2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.

Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG