Rostov-na-Donu şeeriniñ Cenübiy okrugınıñ arbiy mahkemesi «qırımlı musulmanlar davasınıñ» mabüsleri Rustem Murasov, Cebbar Bekirov, Zaur Abdullayev ve Rustem Tairovnıñ ükümlerini çıqardı. Bu aqta «Qırım birdemligine» advokat emil Kurbedinov haber etti.
Mabüsler «Aqyardaki ekinci Hizb ut-Tahrir davasına» istinaden apiske alınğan edi. Bekirov 17 yılğa azatlıqtan marum etildi, qalğanları 12 yıl sert rejimli koloniyada qalmasına üküm etildi. İlk 4 yılını apishanede keçirecekler.
«Sebepsiz, qanunsız bir üküm, bu insanlar cinayetçi degil, yapqanları bir eyilik, diger qorantalarğa yardım ete, mahkemelerge kele ediler, fikirleri bar edi, dinlerini küte ediler», – dep qayd etti Kurbedinov.
2021 senesi avgustnıñ 7-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
«Qırım birdemligi» cemaat birleşmesi advokat Aleksey Ladinniñ malümatına esaslanıp, tutulğan qırımtatarlar «terror teşkilâtını quruv ve iştirak etüvden» şübheli sayıla, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
