Qırımda internette "ruslarğa qarşı zorbalıq çağıruvları" içün yerli sakin eki yılğa üküm etildi. Bu aqta Rusiye kütleviy haber vastaları Qırım ve Aqyar boyunca Rusiye FSB-siniñ matbuat hızmetine atıf etip bildire.
1977 senesi doğğan erkek, Telegramda "ekstremizm çağıruvları" ile tefsirlerni yazğanı iddia etile. Ne vaqıt ve qayda tutılğanı belli degil. Qırımlınıñ yazğanları aqqında tam olaraq ne ve qaysı subetlerde yazğanı aqqında da haber etilmey.
Erkekniñ adı ve soyadı bildirilmey, onıñ açıq izaatları da yoq. Cenk şaraitlerinde Rusiye quvetçileriniñ aytqanlarını teşkermek imkânsızdır.
Daa evel Ukrayina prezidentiniñ Qırım Muhtar Cumhuriyetindeki temsilciligi, Roskomnadzor Rusiye Federatsiyası tarafından işğal etilgen Ukrayina topraqlarında, şu cümleden Qırımda, informasion boşluq üzerinde nezaretni quvetleştire, dep bildirdi.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını "itibardan tüşürüv" içün yaqalana ve memuriy ve cinaiy mesüliyetke çekile.