Qırımdaki Rusiye mahkemesi "Qırım musulmanları davası" boyunca mahküm etilgen Eskender Abdulganiyevniñ avdokatlarınıñ onıñ cezahanege avuştırılması ile bağlı açqan davanı qanaatlendirmegen.
Advokat Rustem Kâmilevniñ haber etkeni kibi, Abdulganiyev Rusiye apishanesinde endi müddetinden ziyade vaqıt keçirgen ve onı sert rejim cezahanesine avuştırmaq kerekler. Amma cevapkâr tarafınıñ temsilcisi bugünki oturış vaqtında ükümde mabüsniñ apishanede keçirecek müddeti keregi kibi yazılmağanını qayd etken.
"Yani bu vaziyette olar inatlıq yapalar. Demek, ükümde doğru yazılğan olsa edi, onı avuştırır ediler. Amma Ceza qanunnamesiniñ belli qaideleri bar. Şu cümleden 58 madde, şahısnıñ ceza çekecek müddeti, nasıl çekecegi, müddeti, er şey yazılğan", - dep añlattı Kâmilev.
Advokatlarnıñ delilleri qanaatlendirilmedi, bunıñ içün mudafaa tarafı istinaf şikâyetini berecek.
Adliyeciler siyasiy mabüsnen laf etken soñ "Vladimirskiy tsentral"da Abdulganiyevniñ aqları bozulğanını bildiler. Körüşmek onen yılda bir kere mümkün amma qırımtatarğa bu körüşüvde bile red eteler.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
