Rusiyege boysunğan Qırım Yuqarı mahkemesi Saq rayonınıñ 33 yaşındaki sakinini devlet hainliginde qabaatlı tanıp, onı 12 yıl sert rejimli koloniyada qalmasına üküm etti.
Kütleviy haber vastalarınıñ malümatına köre, FSB hadimleri mahkümni Rusiyeniñ Pskov vilâyetinde tuttı.
"Erkek 2022 senesi avgust ayında Ukrayina Silâlı quvetlerine yardım etmek maqsadınen ava mudafaası kompleksiniñ iş ketişatını videoyazıp, bulunğan yerini izaatlay edi. Haberlerni o, içtimaiy ağlardan biriniñ yardımınen ukrayin tarafı qullanğan chat-botqa yollay edi", — dep aytıla Rusiye prokuraturasınıñ haberinde.
Rusiye kütleviy haber vastaları mabüsniñ adını ve soyadını, em de onıñ açıq izaatlarını derc etmey.
Qırımda ve Aqyarda 2014 senesinden başlap eñ azından 16 Ukrayina vatandaşı "casuslıq" ve "diversiya"da qabaatlanıp mahküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
