Aqmescitteki Rusiye mahkemesi "Qırım musulmanları davası" boyunca 12 yılğa mahküm etilgen qırımtatar siyasiy mabüsi Eldar Kantimirovnıñ SİZO-da bulunğan müddetini apis cezasına qoşmaq talabını red etti. Bu aqta "Qırım birdemligi" haber ete.
Dava arizalarında, Rusiye Federatsiyasınıñ Ulyanovsk vilâyetiniñ Dimitrovgrad apishanesiniñ memuriyeti, apishanede bulunğan müddetini yañlış esaplağanı qayd etile, dep tarif etti adliyeci Rustem Kâmiylev.
Advokat, tutuluv ve apiste tutuv müddeti apis müddeti olaraq sayılsın, dep israr etti.
"Böylece, Rusiye Federatsiyası Ceza kodeksiniñ 58-inci maddesine köre, terrorizm maddesine istinaden mahküm etilgen mabüslerge ceza müddetiniñ bir qısmı apiste berile. O, mahküm etilgenine qadar apiste keçken müddet esapqa alınsa, eñ az bir yıl anda qala bile. Kâmilevniñ aytqanına köre, sıq-sıq mahkemeler bu qaideni yañlış añlaylar. Mahkeme davanı bütünley red etti", – dep aytıla beyanatta.
Rusiye mahkemesi Eldar Kantimirovnı 12 yılğa, Timur Yalkabovnı 17 yılğa azatlıqtan marum etti. Olarnı Rusiyede yasaq etilgen, amma Ukrayina ve dünyanıñ bir çoq memleketinde milliy qanunlar seviyesinde sıñırsız faaliyet köstergen "Hizb ut-Tahrir" diniy teşkilâtınıñ faaliyetine alâqası olğanında qabaatladılar.
"Memorial" uquq qoruyıcı merkezi "Qırım musulmanları davasınıñ" mabüslerini siyasiy mabüsler olaraq tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
