Soçi şeeriniñ umumiy adliye üçünci istinaf mahkemesi Aqmescitteki ekinci «Hizb ut-Tahrir davasınıñ» mabüsi, qırımlı cemaat jurnalisti Rustem Şeyhaliyevniñ imayesi bergen istinaf şikâyetlerini red etip, onı apiste qaldırdı.
Böylece, o, sentâbrniñ 15-ne qadar SİZOda qalacaq. Bu aqta «Qırım birdemligi» cemaat birleşmesi advokat Emine Avamilevanıñ malümatına esaslanıp bildire.
«Beklegenimiz kibi, qarar deñiştirilmedi. Şikâyetlerimiz red etildi», – dep ayttı advokat.
Cemaat jurnalistiniñ imayesi IV Jeneva şartnamesine esaslanıp, onı qullanmağa talap etti, mabüs ise mahkemede özüni siyasiy mabüs dep saya dedi.
Rustem Şeyhaliyev 2015 senesinden berli Qırımdaki tutuv ve tintüvlerni aydınlatqan, cep telefonına foto ve video çıqarğan edi. 2019 senesi martnıñ 27-nde onı apiske aldılar. Rusiye FSBsi Şeyhaliyevni «Hizb ut-Tahrir» teşkilâtında iştirak etkeninden şübheli saya.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
