Rusiyeniñ Rostov-na-Donudaki Cenübiy okrugınıñ arbiy mahkemesi dekabrniñ 21-nde Qarasuvbazardaki «Hizb ut-Tahrir davasınıñ» mahkeme tahqiqatını bitirdi. «Qırım birdemligi» cemaat birleşmesi haber etkenine köre, mahkeme soñki 10 imaye şaatınıñ sorğusını «artqaç» saydı, neticede advokatlar aytqan 28 şaattan 18-i sorğuğa çekildi.
«Nazim Şeyhmambetov bir sıra muracaat berdi, hususan yapqan tilşınaslıq ekspertizamıznıñ ilâve etilmesini, psihologlarnı celp etip, ilâve ekspertizanı belgilev aqqında, çünki davadaki ekspertiza qanun normalarına uyğun degil. Psiholog celp etilmedi. Prokuror qarşı çıqtı. Mahkeme razı olmadı», – dep tarif etti advokat Safiye Şabanova.
Bundan ğayrı, mahkeme müvekkilleriniñ cep telefonlarınıñ billingini red etti ve BM qararını qoşmağa razı olmadı, tek müvekkillerni tasvir etken malümatnı qoşmağa razı oldı.
Enver Ömerov, Riza Ömerov ve Ayder Cepparov 2019 senesi iyünniñ 10-nda Rusiye quvetçileri keçirgen saba tintüvlerinden soñ tutuldı.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
