Rusiye mahkemesi Aqmescit rayonındaki islâm mektebini qapatmağa qarar berdi. Oquv yurtu "Qırım ve Aqyar şeeri musulmanları diniy idaresinden" (QMDİ) mustaqil olaraq çalışa edi. Qapatılmasınıñ resmiy sebebi "habaşizm mefküresiniñ teşviqatı" oldı, dep bildire Ukrayina prezidentiniñ QMC temsilciligi.
Qayd etilgenine köre, 2014 senesi yarımadada 2220 diniy teşkilât bar edi, amma 2024 senesi yanvar ayına qadar olarnıñ sayısı 932ge qadar eksildi. Bu eksilüv Rusiye qanunlarınıñ kirsetilmesi ve mustaqil din cemiyetlerine qarşı sistematik basqınıñ neticesidir, dep qayd etile haberde.
Kreml kontrolindeki müftiyatnıñ malümatına köre, 2023 senesiniñ başında Qırımda onıñ nezaretinde olmağan tek 10 cami bar edi. Bu kibi obyektlerniñ yoq etilmesi Rusiye qanun qoruyıcı organlarınıñ yardımı ile yapıla.
Temsilcilikniñ bildirgenine köre, tek 2024 senesi yanvar ayında qırımtatarlarnıñ diniy sebeplerden taqip etilüvi 100-den ziyade qayd etildi.
Habaşizm 1980 seneleriniñ ortasında qurulğan, ananeviy olmağan diniy areket ve siyasiy firqadır. Bu areketniñ tarafdarları islâmnıñ konservativ yönelişlerini tenqit etkeni ile belli. Bu areket, zemaneviy islâm gruppaları arasında "eñ zıddiyetli musulman birleşmelerinden biri" olaraq tasvir etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
