Aqmescitniñ Rusiye nezareti altında olğan Demiryol rayon mahkemesi "Qırım" qırımtatar gazetiniñ baş muarriri Bekir Mamutovnı "malümat serbestliginiñ bozuluvında" qabaatlı tanıp, oña 4 biñ ruble para cezasını berdi. Bu aqta "Qırım esnası" haber ete.
Bu, Mamutovğa qarşı bu sene üçünci davadır, dep qayd eteler uquq qoruyıcılar
Bu sefer memuriy mesüliyetke çekilmek içün sebep, sovet uquq qoruyıcılarından biriniñ tercimeialını "Amerika Sesi" ve "Azatlıq Radiosı"nda çalışqanı aqqında yazıp, derc etüv oldı.
Bu kütleviy haber vastaları şimdi Rusiye akimiyeti tarafından çetel agentleri olaraq tanıla, şunıñ içün kütleviy haber vastaları bu hususta malümatnı derc etmege mecburlar.
Davanıñ baqıluvı terrorist telükeleriniñ ögüni almaq içün mahkeme binasına kirsetilmegen diñleyicilerniñ iştiragisiz keçti.
Mamutovğa nisbeten qarar alğan mahkemeci Mariya Domnikov mayıs ayında ukrayin mahkemesi tarafından ğıyabiy şekilde 13 yılğa azatlıqtan marum etildi.
Mayısnıñ 17-nde Qırımda Rusiye quvetçileri "Qırım" gazetiniñ baş muarriri Bekir Mamutovnıñ ve "Qırım" gazetiniñ tesisçisi Seyran İbragimovnıñ evlerinde tintüvler keçirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
