Çelâbinskteki Rusiye mahkemesi apiste sağlığı fenalaşqan "Qırım musulmanları davası"nıñ figurantı Tofik Abdülgaziyevniñ azat etilmesi aqqında advokatlarnıñ muracaatını red etti. Bu aqta onıñ apayı Aliye Kurtametova Facebook saifesinde haber etti.
"Aqayımnıñ apishanedeki alı aqqında aytmağan adam qalmadı. Biz er bir qapunı qaqtıq, bütün dünyağa qırımtatar musulman öle yata, dep qıçırdıq. Amma öyle oldı ki, bir vaqıtları kâğıt bile müim olğan bir dünyada, şimdi vesiqalarnıñ suvuq müürleri iç bir şey ifade etmey. (Qanun boyunca!) kirsetilgen hastalıqlarnıñ bar olğanını tasdıqlağan tibbiy neticeler bile bir şey degil", — dep yazdı o.
Qadın qayd etti ki, advokatnıñ mahkümniñ pek azğanı aqqında aytqanlarına mahkemeci: "O şifahanede degil de" dep cevap berdi.
"Yani, qorqunçlı hastalıqlarğa sebep olğan yaramay şaraitler sebebinden qırq kilo azması normal bir şey", — dep yekünledi Kürtametova.
O şunı da qoştı ki, imayesi aqayınıñ azat etilmesi içün küreşmege devam etecek.
Daa evel Abdülgaziyevni reanimatsiyağa yolladılar, amma bir aydan soñ veremden ğayrı daa bir sıra hastalığı qayd etildi. Olarnıñ arasında — eki taraflı pnevmoniya, sol taraflı kiçik gidrotaraks, anemiya, mitral klapanı zararlanğan (yürek hastalığı), hronik yürek yetersizligi ve gastrit.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
2022 senesi mayısnıñ 12-nde Rostov-na-Donudaki Cenübiy bölgesiniñ arbiy mahkemesi ekinci Aqmescit «Hizb ut-Tahrir davasınıñ» mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovğa üküm çıqardı. Olar 12 ile 14 yıl apis cezalarsına mahküm etildiler. İzzet Abdullayev ilk 5 yılını apishanede keçirecek 12 yıl sert rejimli koloniyada qalmasına ve azat etilgen soñ 1 yıl azatlığı sıñırlanacaq, dep üküm çıqarıldı.
2023 senesi iyül ayında Tofik Abdulgaziyev Rusiye Federatsiyasınıñ Çelâbinsk vilâyetiniñ Verhneuralsk apishanesine etap etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
